ye dil hi jalva-gah hai us ḳhush-ḳhiram ka
dekha to sirf naam hai bait-ul-haram ka
ma.ani men lafz ek hai ye rabb-o-ram ka
hasil ye hai ki hai vahi hasil kalam ka
dekha to sab haqiqat-o-ma.ani men ek hain
surat men garche farq hai aapas men naam ka
us la-makan ka koi muayyan nahin makan
gar hai to dil Thikana hai us ke maqam ka
masrur teri mai se ik aalam hai saqiya
ummid-var main bhi huun do ek jaam ka
aghaz-e-ishq men gaya dil haath se mire
anjam kya ho dekhiye ab mere kaam ka
lete hain chuur karne ko hi sang-dil huzur
kiya hai vagarna shisha-e-dil un ke kaam ka
Leave a Reply