is ada se vo jafa karte hain
koi jaane ki vafa karte hain
yuun vafa ahd-e-vafa karte hain
aap kya kahte hain kya karte hain
ham ko chhedoge to pachhtaoge
hansne valon se hansa karte hain
nama-bar tujh ko saliqa hi nahin
kaam baton men bana karte hain
chaliye ashiq ka janaza uttha
aap baithe hue kya karte hain
ye batata nahin koi mujh ko
dil jo aata hai to kya karte hain
husn ka haq nahin rahta baaqi
har ada men vo ada karte hain
tiir aḳhir badal-e-kafir hai
ham aḳhir aaj dua karte hain
rote hain ghair ka rona pahron
ye hansi mujh se hansa karte hain
is liye dil ko laga rakkha hai
is men mahbub raha karte hain
tum miloge na vahan bhi ham se
hashr se pahle gila karte hain
jhank kar rauzan-e-dar se mujh ko
kya vo shoḳhi se haya karte hain
us ne ehsan jata kar ye kaha
aap kis munh se gila karte hain
roz lete hain naya dil dilbar
nahin malum ye kya karte hain
‘dagh’ tu dekh to kya hota hai
jabr par sabr kiya karte hain