Syed Ahmed Shameem
tha a.ine ke samne chehra khula hua
paani pe jaise chand ka saaya paḌa hua
ghulti ga.i badan men tamazat sharab ki
saghar nigah ka tha labalab bhara hua
kal raat thoḌi der ko palken jhapak ga.iin
jaaga to joḌ joḌ tha apna dukha hua
shayad ki so ga.e hain bahut thak ke dil-jale
shahr-e-junun tamam hai suuna paḌa hua
tahzib DhunDhti hai kisi irtiqa ki shakl
iqbal-mandiyon ka hai suraj Dhala hua
dil ka vajud gham ke andhere men kho gaya
jaise kisi mazar ka katba miTa hua
kandhe pe Dho raha huun ga.e vaqt ki salib
kanTon ka taaj sar pe hai apne rakha hua
gharqab ho na jaa.e kahin zabt ka jahan
phir aaj dard-e-dil ka hai dariya chaḌha hua
halat na ab ‘shamim’ ki puchho ki vo gharib
hoga kisi gali men tamasha bana hua
Leave a Reply