Hina Ambareen Tariq
vo agar aa.e to pur-nur saman hota hai
us ke aane se hi mausam ye javan hota hai
hal-e-dil kab ye nigahon se bayan hota hai
raz-e-ulfat na ye auron pe ayaan hota hai
na kabhi shor na hi ah-o-fughan hota hai
jo bhi hota hai faqat zer-e-zaban hota hai
yuun guzarta hai mulaqat ka har ik lamha
jaise lamhat ka dariya ye ravan hota hai
raat sajti hai sitaron men koi hai basta
har sitare ka koi ek makan hota hai
jagti ankhon se main ḳhvab huun dekha karti
meri nindon men basa ek jahan hota hai
Leave a Reply