Zarurat Se Ziyaada Ji Raha Hai

zarūrat se ziyāda jī rahā hai

adhūrā shaḳhs puurā jī rahā hai

hai bārish kī musalsal mehrbānī

mire sahrā meñ dariyā jī rahā hai

dar-o-dīvār sāñseñ le rahe haiñ

tabhī kamre kā parda jī rahā hai

basā hai tū mirī āñkhoñ meñ jab se

yahāñ rañgoñ kā mela jī rahā hai

sabhī hāthoñ meñ apne phuul de kar

ḳhushī ke saath gamlā jī rahā hai

nikal bhī aa vahāñ tū chāñd ban kar

jo tere bin ilāqa jī rahā hai

Leave a Comment