Urooj Zaidi Badayuni
band hain dil ke dariche raushni madum hai
ab jo apna hashr hona hai hamen ma.alum hai
hasb-e-nairang-e-jahan dil shaad ya maghmum hai
aadmi jazbat ka hakim nahin mahkum hai
ab takalluf bartaraf ye aap ko ma.alum hai
kyuun mira ḳhvab-e-vafa ta.abir se mahrum hai
husn ḳhud taḌpa kiya hai mujh ko taḌpane ke ba.ad
sochna paḌta hai vo zalim hai ya mazlum hai
ḳhvab aḳhir ḳhvab hai is ḳhvab ka kya e’tibar
jannat-e-nazzara goya jannat-e-mauhum hai
haa.e ye tarfa ma.al-e-arzu-e-sub.h-e-nau
jis taraf nazren uThata huun faza masmum hai
mere kirdar-e-vafa ki a.ina-dari ba-ḳhair
kyuun zaban-e-dost par al-shaz-o-kal-madum hai
dekhne ki chiiz hai ye sehr-e-andaz-e-nazar
un ka har mub.ham ishara hamil-e-mafhum hai
ḳhaar bhi na-mutma.in hain phuul bhi na-mutma.in
baghban ke is nizam-e-gulistan ki dhuum hai
ab use mahaul jis qalib men chahe Dhaal de
fitratan to aadmi ik paikar-e-mafhum hai
jo bhari mahfil men nazron ki hui hai guftugu
husn ko ma.alum hai ya ishq ko ma.alum hai
kitni kaif-avar hai in ki shirkat-e-gham bhi ‘uruj’
matam-e-dil ki jagah jashn-e-dil-e-marhum hai
Leave a Reply