Saima Aftab
xdin-o-duniya bhula ke baiThe hain
rang aisa chaḌha ke baiThe hain
ishq bhi maqsad-e-hayat nahin
ishq ko aazma ke baiThe hain
ek shikvon bhara kiya massage
ek picture jala ke baiThe hain
phir muravvat men jast bhar li aur
phir na.i choT kha ke baiThe hain
baat se baat ban paḌe apni
baat aage baḌha ke baiThe hain
jo mira saath dene nikle the
ab vahi laḌkhaḌa ke baiThe hain
ham use yaad kar saken far-far
is liye paas aa ke baiThe hain
Leave a Reply