Dhup Se Jism Bachae Rakhna Kitna Mushkil Hai

Naseem Sahar

dhuup se jism bacha.e rakhna kitna mushkil hai

ḳhud ko saa.e saa.e rakhna kitna mushkil hai

zahir men jo rasta sidha lagta ho us par

apne pair jama.e rakhna kitna mushkil hai

avazon ki bhiiḌ men itne shor-sharabe men

apni bhi ik raa.e rakhna kitna mushkil hai

ham se puchho ham dil ko samjhaya karte the

vahshi ko samjha.e rakhna kitna mushkil hai

sirf parinde ko ma.alum hai tez havaon men

apne par phaila.e rakhna kitna mushkil hai

aaj ki raat hava.en behad sarkash lagti hain

aaj charagh jala.e rakhna kitna mushkil hai

dostiyon aur dushmaniyon ki zad men rah ke ‘nasim’

apna-ap bacha.e rakhna kitna mushkil hai