poet

Us Pe Karna Mere Nalon Ne Asar Chhod Diya

us pe karna mire nalon ne asar chhod diya

mujh ko ek lutf ki kar ke jo nazar chhod diya

saunp kar khana-e-dil gham ko kidhar jaate ho

phir na paoge agar us ne ye ghar chhod diya

ashk-e-sozan ne jalae mire lakhon daman

ponchhna main ne to ab dida-e-tar chhod diya

bakhiya-gar jal gaya kya haath tira sozish se

karte karte jo rafu chak-e-jigar chhod diya

gulshan-e-dahr men khami ne bachaya ham ko

dekh kar khaam kudurat ne samar chhod diya

le gae samne hakim ke mire qatil ko

is ko us ne bhi samajh khun-e-pidar chhod diya

nek o bad kuchh nazar aata nahin vo vahshat hai

parda ghaflat ka mire pesh-e-nazar chhod diya

kucha-e-zulf ko katra ke gaya dil rukh par

us ne vo rasta-e-pur-khauf-o-khatar chhod diya

ai falak khana-kharabi ki hai parva kis ko

dasht men rahte hain muddat hui ghar chhod diya

mujh pe ehsan saba ka hai ki kuche men tire

khaak ko meri sar-e-rahguzar chhod diya

mujh ko ai aah taajjub hai ki kashana-e-ghair

kal shab-e-hijr ne barsa ke sharar chhod diya

bhar gaya dil mira ek chiiz ko khate khate

khun-e-dil khaenge ab khun-e-jigar chhod diya

bojh se aap hi mar jaega kyuun ho badnam

ye samajh kar but-e-saffak ne sar chhod diya

nahin tir-e-nigah-e-yar se bachna mumkin

kal hai maujud vo din aaj agar chhod diya

aa gaya dil men jo aalam ka musakhkhar karna

zulf ko chehre pe hangam-e-sahar chhod diya

ye nahin hai rah-e-but-khana kidhar jaana hai

aaj se ham ne tira saath khizar chhod diya

kar diya tiron se chhalni mujhe saara lekin

khuun hone ke liye us ne jigar chhod diya

saath dekha tha use kal to tere ai majnun

aaj us ‘arif’-e-vahshi ko kidhar chhod diya

More Poems

Leave a Comment