Wo Meri Bekasi Par Kash thoDa Mehrban Hota

vo merī bekasī par kaash thoḌā mehrbāñ hotā

pareshāñ-hāl ho kar maiñ yaqīnan shādmāñ hotā

yaqīñ kar ki maiñ tujh se bhī ziyāda chāhtā us ko

jo mere jaisā terā aur koī qadr-dāñ hotā

khare khoTe kā andāza tujhe bhī kuchh to lag jaatā

raqīb-e-rū-siyah kā jo liyā gar imtihāñ hotā

na hotā dasht-o-vīrāna agar sahrā-e-be-pāyāñ

ġharīb āshiq koī ābād phir jā kar kahāñ hotā

makāñ is daur meñ pocket edition bante haiñ ‘ḳhushtar’

koī dālān āñgan aur koī sā.ebāñ hotā

Leave a Comment