Habib Jalib
zarre hi sahi koh se Takra to ga.e ham
dil le ke sar-e-arsa-e-gham aa to ga.e ham
ab naam rahe ya na rahe ishq men apna
rudad-e-vafa daar pe dohra to ga.e ham
kahte the jo ab koi nahin jaan se guzarta
lo jaan se guzar kar unhen jhuTla to ga.e ham
jaan apni ganva kar kabhi ghar apna jala kar
dil un ka har ik taur se bahla to ga.e ham
kuchh aur hi aalam tha pas-e-chehra-e-yaran
rahta jo yunhi raaz use pa to ga.e ham
ab soch rahe hain ki ye mumkin hi nahin hai
phir un se na milne ki qasam kha to ga.e ham
uTThen ki na uTThen ye raza un ki hai ‘jalib’
logon ko sar-e-dar nazar aa to ga.e ham
Leave a Reply