maimoona-abbas-khan

Main Aur Tum

raat ke pichhle pahar ki sunsan sadken

rim-jhim barasti barish ki phuvar men bhigti

jaise ji uthi thiin

jab mere haath apne hathon men liye tum ne

lams ki hiddat se bojhal hoti

be-tartib sanson ke beach ulajhti

apni dil-nashin avaz

mere kanon men tumhare liye

meri akhiri nazm surat utari thi

is anmol lamhe men

tumhari zaat ke sehr men khoi hui main

kisi anjan si yaad ki kasak tale

dhire se sulagte hue tum

mohabbat ka uluhi naghma alaptin

gaadi ke shishon se takratin

rim-jhim barasti bunden

dashboard pe dhari bhaap udati

hamare labon men paivast hone ko be-qarar

kaafi ki do muntazir pyaliyan

chahar-su chhai tumhare ehsas ki khushbu se

jaise javedan ho chale the

yaad nahin padta hai ab

ki main tum aur kaafi ki mahak

barish ke haale men

tumhari nazmon ki chhatri tale

ek dusre men kitna ghul gae the

bas itna pata hai

ki

vaqt

is lamhe

apni mutthi men qaid

hamare hisse ke pal

ham pe varne

thahar gaya tha

More Poems

Leave a Comment