Karo Talash Had-E-Asman Milne Na Mile

Poet

karo talash had-e-asman milne na mile

nishan-e-rahguzar-e-karvan mile na mile

chalo jala.e hue mash.al-e-yaqin dil men

kanar-e-bahr-e-muhit-e-guman mile na mile

ravan-davan huun har ik mauj-e-ḳhush-ḳhiram ki samt

pas-e-sarab vo ju-e-ravan mile na mile

abhi sada-e-jaras gunjti hai kanon men

suragh-e-qafila-e-raftgan mile na mile

abhi na daman-e-ummid chhuTne paa.e

phir ek baar vo nazdik-e-jan mile na mile

har ek gaam hai ik sajda-gah ‘tamanna.i’

jabin ko sang-e-dar-e-astan mile na mile