hasrat hai tujhe samne baithe kabhi dekhun
main tujh se mukhatib huun tira haal bhi puchhun
dil men hai mulaqat ki khvahish ki dabi aag
mehndi lage hathon ko chhupa kar kahan rakkhun
jis naam se tu ne mujhe bachpan se pukara
ik umr guzarne pe bhi vo naam na bhulun
tu ashk hi ban ke miri ankhon men sama ja
main aina dekhun to tira aks bhi dekhun
puchhun kabhi ghunchon se sitaron se hava se
tujh se hi magar aa ke tira naam na puchhun
jo shakhs ki hai khvab men aane se bhi khaif
aina-dil men use maujud hi dekhun
ai meri tamanna ke sitare tu kahan hai
tu aae to ye jism shab-e-gham ko na saunpun
Leave a Reply