mohabbat ki vo aahat pa na jaae
adaon men takalluf aa na jaae
tiri ankhon men ankhen daal di hain
karen kya jab tujhe dekha na jaae
kahin khud bhi badalta hai zamana
zabardasti agar badla na jaae
mohabbat raah chalte tokti hai
kisi din zad men tu bhi aa na jaae
vahan tak diin ke sathi hazaron
jahan tak haath se duniya na jaae
tire josh-e-karam se dar raha huun
dil-e-dard-ashna itra na jaae
kahan tum dard-e-dil le kar chale ‘najm’
mizaj-e-dard-e-dil puchha na jaae
Leave a Reply