aaj yuun mauj-dar-mauj gham tham gaya is tarah gham-zadon ko qarar aa gaya
jaise khush-bu-e-zulf-e-bahar aa gai jaise paigham-e-didar-e-yar aa gaya
jis ki did-o-talab vahm samjhe the ham ru-ba-ru phir sar-e-rahguzar aa gaya
subh-e-farda ko phir dil tarasne laga umr-e-rafta tira e’tibar aa gaya
rut badalne lagi rang-e-dil dekhna rang-e-gulshan se ab haal khulta nahin
zakhm chhalka koi ya koi gul khila ashk umde ki abr-e-bahar aa gaya
khun-e-ushshaq se jaam bharne lage dil sulagne lage daagh jalne lage
mahfil-e-dard phir rang par aa gai phir shab-e-arzu par nikhar aa gaya
sarfaroshi ke andaz badle gae davat-e-qatl par maqtal-e-shahr men
daal kar koi gardan men tauq aa gaya laad kar koi kandhe pe daar aa gaya
‘faiz’ kya janiye yaar kis aas par muntazir hain ki laega koi khabar
mai-kashon par hua mohtasib mehrban dil-figaron pe qatil ko pyaar aa gaya
Leave a Reply