puchhte kya ho tira ye haal kaisa ho gaya
tum na jaano to ḳhuda jaane mujhe kya ho gaya
ashiqi men vahm baḌhte baḌhte sauda ho gaya
qatra qatra jam.a hote hote dariya ho gaya
vo sarapa naaz hai mujh se bura to kya karun
chaar ne achchha kaha jis ko vo achchha ho gaya
ashiqi men naam agar darkar hai bad-nam ho
dekh sab kuchh ho gaya jab qais rusva ho gaya
kuchh ho lekin ab mira dil tum se phir sakta nahin
ye to jis ka ho gaya kam-baḳht us ka ho gaya
apne pahlu men biThaya aap ne aghyar ko
dekhiye baiThe biTha.e ka ye jhagḌa ho gaya
le liya yad-e-mizha ne mujh ko sail-e-ashk se
Dubne vaale ko tinke ka sahara ho gaya
dagh-ha-e-hijr men bhi dil men hain ḳhar-e-shauq bhi
baagh ka baagh aur ye sahra ka sahra ho gaya
le ke dil ilzam dete ho ghanimat hai yahi
maal ka muul aa gaya adle ka badla ho gaya
dil ki ghabrahaT nasim-e-sub.h-dam se kam hui
vo na aa.e ghaib se saman paida ho gaya
kya yahi hai sharm tere bhole-pan ke main nisar
munh pe donon haath rakh lene se parda ho gaya
meri har ik baat qanun-e-mohabbat hai magar
ai safi’ main sha.iri karne se jhuTa ho gaya
Leave a Reply