ahmad-mahfuz

Sar-Ba-Sar Paikar-e-Izhaar Mein Lata Hai Mujhe

sar-ba-sar paikar-e-iz.har men laata hai mujhe

aur phir khud hi tah-e-khak chhupata hai mujhe

kab se sunta huun vahi ek sada-e-khamosh

koi to hai jo bulandi se bulata hai mujhe

raat ankhon men miri gard-e-siyah Daal ke vo

farsh-e-be-khvabi-e-vahshat pe sulata hai mujhe

gum-shuda main huun to har samt bhi gum hai mujh men

dekhta huun vo kidhar DhunDne jaata hai mujhe

didani hai ye tavajjoh bhi ba-andaz-e-sitam

umr bhar shisha-e-khali se pilata hai mujhe

hama-andesha-e-girdab ba-pahlu-e-nashat

mauj-dar-mauj hi sahil nazar aata hai mujhe

More Poems

Leave a Comment