mere liye vajud ka dariya sarab tha
nakamiyon ke baab men main kamyab tha
baḳhshe hain mujh ko phuul mohabbat ki aag ne
mere liye sukun ka sabab iztirab tha
main ne safed lafz likhe aur sach likhe
meri sadaqaton ka bayan be-ḳhizab tha
isyan shumar the jo farishte vo thak ga.e
ik fard-e-sad-gunah se main be-hisab tha
kya mujh se intiḳhab ki karta hai aarzu
main to nigah-e-sher ka ḳhud intiḳhab tha
hijr-o-visal ḳhatm hue Thiik hai ye khel
tujh ko bhi nagavar mujhe bhi azaab tha
be-dagh kah raha hai jo apne jamal ko
kal shab miri baghal men yahi aftab tha
meri kitab rasm-e-jahan hai vagarna main
vo sahib-e-kitab huun jo be-kitab tha
‘sahba’ mire vajud pe har mai-kade se duur
chhaya tha vo surur ki paani sharab tha
Leave a Reply