jahan pe ilm ki koi qadr aur havala nahin
main us zamin pe paanv bhi rakhne vaala nahin
main us daraḳht ke andar tha jis ko kaaTa gaya
kisi ne bhi to vahan se mujhe nikala nahin
vo apne ahd se aage ki baten karne laga
bahakte shaḳhs ko duniya ne phir sambhala nahin
har ek choT pe kuchh aur juḌne lagta tha
so us ne mujh ko kisi shakl men bhi Dhala nahin
ajiib ḳhauf men parvan chaḌh rahi hai ye nasl
kisi ke haath men bhi zahr ka piyala nahin
ab apni sanson se zanjir toḌni hai mujhe
ki haath bechne ka aur kuchh izala nahin
Leave a Reply