ye haath apna mire haath men thama diije
thaka hua huun zara dil ko hausla diije
bas ab mile hain to kiije na as-pas ka ḳhauf
jo sang-e-rah mile paanv se haTa diije
ye aur daur hai aur sab yahan mujhi se hain
vo kohkan ki hikayat sab bhula diije
nahin hai aap ko fursat agar tavajjoh ki
to main bhi lauTta huun ghar ko aa gaya diije
mira vajud bhi hai aap ki jabin ka daagh
use bhi harf-e-ghalat ki tarah miTa diije
kal aap ne jo chhuḌaya to chhuT sakega na haath
jo uljhanen hain mujhe aaj hi bata diije
ye khel khela hai jab pyaar ka to phir ai dil
ab apne-ap ko bhi daav par laga diije
tamam-umr bhaTakti rahi nazar ki kahin
mile koi jise nazrana-e-vafa diije
miri to jumbish-e-lab bhi hai na-ḳhushi ka sabab
ab aa.i hai koi tarz-e-bayan sikha diije
vafa hai jurm to iqrar-e-jurm hai mujh ko
ye main huun ye mira dil lijiye saza diije
vo sahme sahme juda.i ke muztarib lamhe
miri nigah men ik baar phir basa diije
gaya nahin hai abhi daur aap ka ‘anjum’
jo dil udaas ho phir se use sada diije
Leave a Reply