Main Bikhar Na Jaun Waraq Waraq Mujhe Taq-E-Dil Mein Sajaiye

Sabiha Sumbul

main bikhar na ja.un varaq varaq mujhe taq-e-dil men saja.iye

mira harf harf hai be-baha mujhe is tarah na miTa.iye

hai kuduraton ke hisar men ye mohabbaton ka hasin nagar

ye dayar-e-ab-e-hayat hai ise sam-kada na bana.iye

koi aks tak na Thahar saka miri chashm-e-fikr-o-ḳhayal men

abhi ajnabi se hain ḳhal-o-ḳhad mujhe aa.ina na dikha.iye

pas-e-zulm aap ki baḳhshishen ye inayaten ye saḳhvaten

koi maang baiThe na ḳhun-baha ye lahu ke daagh chhupa.iye

ho dilon men husn-e-qalandari ho zaban pe na.ara-e-sarmadi

jo hila de taḳht-e-sikandari vahi kaj-kulahi dikha.iye

hai ḳhizan ki zad pe abhi talak ruḳh-e-‘sumbul’ dil-e-yasmin

abhi intizar ka vaqt hai abhi jashn-e-gul na mana.iye