shahar ki fasilon par zaḳhm jagmaga.enge
ye charagh-e-manzil hain rasta bata.enge
peḌ ham mohabbat ke dasht men laga.enge
be-makan parindon ko dhuup se bacha.enge
zahr jab bhi ugloge dosti ke parde men
pattharon ke lahje men ham bhi gunguna.enge
jangalon ki jharnon ki kaghzi ye tasviren
ghar ke band kamron men kab talak saja.enge
ḳhuun ban ke rag rag men duudh maan ka bahta hai
qarz ye bhi vajib hai kaise ham chuka.enge
thak ke lauT ja.engi andhiyan siyasat ki
jin ki lau rahe qaa.em vo diye jala.enge
ye jhuki jhuki palken mat uTha.iye sahab
jhiil jaisi ankhon men log Duub ja.enge
Leave a Reply