Himayat Ali Shayar
main jo kuchh sochta huun ab tumhen bhi sochna hoga
jo hoga zindagi ka Dhab tumhen bhi sochna hoga
abhi to aankh ojhal hai magar ḳhurshid ke hathon
khinchegi jab rida-e-shab tumhen bhi sochna hoga
muqaddar men tumhare kyuun nahin likhkha ba-juz mere
salib-o-dar ka mansab tumhen bhi sochna hoga
ye kaisa qafila hai jis men saare log tanha hain
ye kis barzaḳh men hain ham sab tumhen bhi sochna hoga
ḳhuda aur aadmi donon agar ain-e-haqiqat hain
haqiqat men hai kya maz.hab tumhen bhi sochna hoga
Leave a Reply