Aabaad Gham-O-Dard Se Virana Hai Us Ka

abad gham-o-dard se virana hai us ka

tuuta hua jo dil hai vo kashana hai us ka

jis dil men ki hai shauq vo paimana hai us ka

jis aankh men hai kaif vo mai-khana hai us ka

jab dekhiye kahta hai vahi zikr sunao

maalum hua shauq bhi divana hai us ka

behosh agar main huun to ba-hosh kahan hai

jo khalq hai is dahr men divana hai us ka

din-rat hai ye maskan-e-anvar-e-tasavvur

siina jise kahte hain pari-khana hai us ka

joban ki safai se phisalti hain nigahen

padti hai jidhar aankh pari-khana hai us ka

ai dil havas-e-vasl se mushtaq hain mahrum

jaan avval-e-didar men begana hai us ka

jo sina-e-raushan hai vo hai manzil-e-ulfat

jo dil sifat-e-shama hai parvana hai us ka

kahte hain jise husn vo hai shama-e-jahan-tab

kahte hain jise ishq vo parvana hai us ka

jab fasl-e-gul aati hai sada deti hai vahshat

zanjir ka gul nala-e-mastana hai us ka

dekha to safar ruuh ko hota hai usi se

kahte hain jise maut vo parvana hai us ka

gauhar se fuzun dida-e-ashiq ke hain aansu

daman men hai maashuq ke jo daana hai us ka

kuchh rutba-e-ashiq se bhi ai jaan ho khabar-dar

saman kai rose se shahana hai us ka

munh ashiq-e-sadiq ke na chadh vaiz-e-makkar

har haal men jo haal hai rindana hai us ka

agah nahin qissa-e-mansur se ai dil

dushman hon zan-o-mard vo yarana hai us ka

kya puchhte ho hal-e-‘nasim’-e-jigar-afgar

dekha jise khush-vaza vo divana hai us ka

Leave a Comment