iman ki numa.ish hai sajde hain ki afsane
hain chand jabinon par aur zehn men but-ḳhane
kuchh aql ke matvale kuchh ishq ke divane
parvaz kahan tak hai kis ki ye ḳhuda jaane
kam-zarf ki niyyat kya pighla hua loha hai
bhar bhar ke chhalakte hain akasr yahi paimane
ab rang ke naslon ke but TuuT chuke saaqi
ab kyuun diye jaate hain pahchan ke paimane
tamhid-e-qayamat hai ik raat ka hangama
ehsas ki sham.en hain jazbat ke parvane
saaqi ke saliqe par husn-e-do-jahan sadqe
sayyaron ki gardish hai ya daur men paimane
ye ek laḌi ke sab chhiTke hue moti hain
ka.abe hi ki shaḳhen hain bikhre hue but-ḳhane
kuchh tishna-lab ai saaqi ḳhuddar bhi hote hain
uḌ ja.egi mai rakkhe rah ja.enge paimane
ik kafir-e-mutlaq hai zulmat ki javani bhi
be-rahm andhera hai sham.en hain na parvane
tariḳh varaq apna ulTegi ‘siraj’ ik din
afaq men phir zinda honge mire afsane
Leave a Reply