Jo Shikwa Karte Hain Hashami Se Kam-Numai Ka

Jaleel Hashmi

jo shikva karte hain ‘hashami’ se kam-numa.i ka

unhen bhi Dar hai zamane ki kaj-ada.i ka

phire hain dhuup men saa.e ko saath saath liye

ki khul na jaa.e bharam apni be-nava.i ka

magar kuchh aur hai yaari ki baat shauq se tum

lagao chehron pe ilzam ashna.i ka

araq araq the nadamat ki aanch se ḳhud hi

gila karen bhi to kya teri bevafa.i ka

kuchh is ada se sata.e ga.e hain ham ab ke

har ek saans men andaz hai duha.i ka

chala to huun tire hamrah kuchh qadam hi sahi

jo de to kyuun mujhe ta.ana shikasta-pa.i ka

jo apne dar pe sada di to kya mila pyare

yahi ki naam Dubo aa.e ham gada.i ka

nikal paḌe ho use DhunDne magar ‘hashami’

ye rasta hai miri jaan na-rasa.i ka