ashiq to milenge tujhe insan na milega
mujh sa to koi banda-e-farman na milega
huun muntazir-e-lutf khada kab se idhar dekh
kya mujh ko dil ai turra-e-janan na milega
kahne ko musalman hain sabhi kaabe men lekin
dhundoge agar ek musalman na milega
naseh ise siina hai to ab si le vagarna
phir fasl-e-gul aae ye gareban na milega
rahne ke liye ham se gunahgaron ke ya rab
kya shahr-e-adam men koi zindan na milega
hone ki nahin teri khushi sarv-khiraman
ta khaak men ye be-sar-o-saman na milega
dil us se tu mange hai abas ‘mushafi’ har dam
kya faeda israr ka nadan na milega
Leave a Reply