Koi Hasin Hai Mukhtar-E-Kar-Khana-E-Ishq

koi hasin hai mukhtar-e-kar-khana-e-ishq

ki la-makan hi ki chaukhat hai astana-e-ishq

nigahen dhundh rahi hain dil-e-yagana-e-ishq

ishare puchh rahe hain kahan hai khana-e-ishq

phirenge hashr men gard-e-dil-e-yagana-e-ishq

karenge pesh-e-khuda ham tavaf-e-khana-e-ishq

nai sada ho nae honth hon naya lahja

nai zaban se kahun gar kahun fasana-e-ishq

jo maulvi hain vo likkhenge kufr ke fatve

sunaun surat-e-mansur agar tarana-e-ishq

agar lage to lage chot mere naale ki

agar pade to pade dil pe taziyana-e-ishq

jo daal den use patthar pe bhi phale-phule

darakht-e-tur bane sabz ho ke dana-e-ishq

tumhin kaho jo luta den to kaun khali ho

khazana husn ka afzun hai ya khazana-e-ishq

vo raat aae ki sar tera le ke baazu par

tujhe sulaun bayan kar ke main fasana-e-ishq

vo dar tak aate nahin dar se ham nahin uthte

udhar bahana-e-husn aur idhar bahana-e-ishq

sikhai kis ne ye raftar mere naale ko

kamar ki tarah lachakta hai taziyana-e-ishq

kisi ko pyaar karega shabab men tu bhi

tire bhi ghar men jalega charagh-e-khana-e-ishq

jo khush-navis mile koi denge dil apna

ham is kitab men likhvaenge fasana-e-ishq

gae hain vo miri mahfil men bhuul kar rumal

ye ja-namaz bichha kar padhun dogana-e-ishq

kisi ke husn ne kafir bana diya ‘mail’

laga ke qashqa-e-durd-e-sharab-khana-e-ishq