sabit raha falak mire nalon ke samne
thahri sipar habab ke bhalon ke samne
muusa hain ghash men gesuon valon ke samne
gul hai charagh-e-tur bhi kalon ke samne
phulon ka rang zard hai galon ke samne
sumbul men bal nahin tire balon ke samne
rakhvae jhaad us ne nihalon ke samne
qalamen lagin bilor ki dalon ke samne
jaata huun jab khizan men nihalon ke samne
ankhon se nahren bahti hain thalon ke samne
phule shafaq to zard ho galon ke samne
paani bhare ghata tire balon ke samne
taare hue ghurub khat-o-khal dekh kar
goron ke paanv uth gae galon ke samne
ankhon men phirte hain nahin aate hain ru-ba-ru
parde pade hain dekhne valon ke samne
dekha hai ashiqon ne barahman ki aankh se
har but khuda hai chahne valon ke samne
chhut jaenge asiir chhupa zulf-e-kham najam
katti hain bediyan tire balon ke samne
betab dast-e-shauq hain joban ke ru-ba-ru
bose men jaan ba-lab tire galon ke samne
ifrat-e-mai se mujh ko ye josh-e-surur hai
bajvaun jal-tarang men pyalon ke samne
jild-e-badan hai takhta-e-mashq-e-sipah-e-gham
rahti hai ye kitab risalon ke samne
ankhen tumhari dekh ke kuchh sujhta nahin
bhula huun chaukdi main ghazalon ke samne
darvazon par buton ke lagaya kiye alaav
holi jalai ham ne shivalon ke samne
zulfon men dekhta huun tira chehra-e-sabih
labrez jam-e-shir hai kalon ke samne
tere gada se band hai aalam ka natiqa
aate nahin javab savalon ke samne
khinche buton ne apni taraf zahidon ke dil
qibla-numa phire hain shivalon ke samne
chori se bosa-e-kaf-e-pa len jo ai pari
hont apne chuum luun tire galon ke samne
pahuncha falak ko faqr ka rutba huzur-e-aish
kambal chadhe hain charkh-e-do-shalon ke samne
ahl-e-kitab hain saf-e-mizhgan ke ru-ba-ru
kaghaz ke daste aae risalon ke samne
faiyyaz sailon se nahin karte sar-kashi
shishon ke sar jhuke hain pyalon ke samne
dast-e-jafa uthaenge kya jism-e-zar par
kanta hon tegh-e-naz ke chhalon ke samne
shishe ko husn-e-garm ne paara bana diya
aine ud gae tire galon ke samne
tegh-e-nigah ko motiyon ki daab chahiye
aina rakh ke dekhiye chhalon ke samne
jalte rahe buton ki huzuri men shama-ru
pariyan sati hui hain shivalon ke samne
ham-chashmon par lagai hain us but ne goliyan
tode hue hain sher ghazalon ke samne
jaada bunat bana miri vahshat ke faiz se
gote ke go kohar hue chhalon ke samne
mere hunar ka koi nahin qadr-dan ‘munir’
sharminda huun main apne kamalon ke samne
Leave a Reply