kah rahi hai ye kya saba kuchh soch
ai hasin paikar-e-jafa kuchh soch
chand roza bahar par mat ja
gul ka anjam kya hua kuchh soch
ye hasin rut ye chandni ye bahar
aise aalam men to na ja kuchh soch
kya hue rah-ravan-e-manzil-e-shauq
kyuun hai sunsan rasta kuchh soch
ḳhaar jis se lipaT ke rote the
abla-pa vo kaun tha kuchh soch
ham na honge to teri mahfil men
kaun hoga ghazal-sara kuchh soch
biphri lahron pe chhoḌ di kashti
kya kiya tu ne na-ḳhuda kuchh soch
rahbari ka bharam na khul jaa.e
pa-shikaston ke rahnuma kuchh soch
kis ko chahe tire siva ‘nasir’
kaun hai tujh sa dusra kuchh soch
Leave a Reply