kai girhen ki jin ko kholne ki zid men
apne nakhunon ko ham ganva baithe
kai baten ki jin ko bandhne ki koshishon men
moch aai thi kalai men
kai chehre ki jin ke khal-o-khat ko ham
mitane ke jatan men
dhote rahte the barabar apne lauh-e-chashm
ab bhi gher lete hain
guzarte vaqt ne har tajrabe ko kah ke bachkana
hamen qaail kiya lekin
abhi tak ungliyon ki tiis tadpati hai rah rah kar
larazti hai kalai ab bhi
lauh-e-chashm par har naqsh vazeh-tar hai pahle se
Leave a Reply