zindagi ka nishan hain ham log
ai zamin asman hain ham log
roz jiite hain roz marte hain
kis qadar saḳht-jan hain ham log
zindagi muskura to de ik baar
ek shab mehman hain ham log
suraten dhuul ho chuki hain magar
husn ke pasban hain ham log
ḳhud se milte hain dushmanon ki tarah
ghair par mehrban hain ham log
ik yahi dard to mila hai hamen
sher-o-naghma ki jaan hain ham log
shaḳh-e-gul men jo ham lachak jaa.en
khinch ga.e to kaman hain ham log
ham se milta hai manzilon ka pata
aur ḳhud be-nishan hain ham log
ab bhi lipTe hain teri Thokar se
zindagi teri aan hain ham log
Leave a Reply