tumhare jaane ka gham mana.unga dekh lena
main hijr-e-sahra men ḳhaak uḌa.unga dekh lena
mira ye da.ava hai muddaton tak main ban ke aansu
tumhari ankhon men jhilmila.unga dekh lena
vo saari ghazlen jo bas tumhare liye likhi thiin
vo ab main har shaḳhs ko suna.unga dekh lena
ye tum jo mujh se zara si baton pe ruThte ho
main saari duniya se ruuTh ja.unga dekh lena
tumhari sohbat men itna ḳhush huun ki hans raha huun
tumhari furqat men ḳhuun baha.unga dekh lena
vo ik samundar udasiyon ka jo ruuh men hai
main us samundar men Duub ja.unga dekh lena
tumhari chaukhaT pe jaan de kar amar rahunga
tumhari nabzon men tharthara.unga dekh lena
vo ḳhat tumhare jo jaan se bhi aziz-tar hain
main ek ik kar ke sab jala.unga dekh lena
ik us ka gham hi mira muqaddar koi hai ‘nasir’
abhi to main kitne gham uTha.unga dekh lena
Leave a Reply