Ghulam Mohammad Qasir
siina madfan ban jaata hai jiite jagte razon ka
janchna zaḳhmon ki gahra.i kaam nahin andazon ka
saari chabiyan mere havale kiin aur us ne itna kaha
aThon pahar hifazat karna shahr hai nau darvazon ka
samne ki avaz se mere har ik rabte men haa.il
daa.en baa.en phaila lashkar anjani avazon ka
ankhen aage baḌhna chahen pichhe rah jaati hai nazar
palkon ki jhalar pe numayan kaam sitara-sazon ka
yuun to ek zamana guzra dil-dariya ko ḳhushk hue
phir bhi kisi ne suragh na paaya Duube hue jahazon ka
Leave a Reply