har adavat ki ibtida hai ishq
ki mohabbat ki intiha hai ishq
lo zuleḳha ko kab hua hai ishq
kis qadar taqat-azma hai ishq
falak o mudda.i o yaar o ajal
sab bhale hain magar bura hai ishq
dekhiye is ka hoga kya anjam
ab ḳhuda se hamen hua hai ishq
ho chuka ham se kuchh jo hona tha
tu ne ye haal kya kiya hai ishq
vamiq-o-qais-o-kohkan kya the
ajal-o-afat-o-bala hai ishq
dekhna shauq-o-sharm ka sheva
husn-e-ḳhud-bin hai ḳhud-numa hai ishq
kaun jaane tha us ka nam-o-numud
meri barbadi se bana hai ishq
dil karo ḳhuun to kya hai dildari
jaan jaati rahe to kya hai ishq
gham-zada.i men gham-faza kya kuchh
dil-ruba ya na jan-ruba hai ishq
ba-vafa vo hain bevafa hai husn
bevafa ham hain ba-vafa hai ishq
ghamza sa ghamza gham men karta hai
kuchh se kuchh ab to ho gaya hai ishq
kaise kaison ki us ne li hai jaan
dekhna kya hi ḳhush-ada hai ishq
kyuun ke matam na ab vafa ka rahe
mere marte hi mar miTa hai ishq
dekhna marg-o-zist ke jhagḌe
jan-faza husn-o-jan-guza hai ishq
vaisa hi hai farishta jaisi ruuh
ai ‘qalaq’ tera ashna hai ishq
Leave a Reply