Har Adawat Ki Ibtida Hai Ishq

har adāvat kī ibtidā hai ishq

ki mohabbat kī intihā hai ishq

lo zuleḳhā ko kab huā hai ishq

kis qadar tāqat-āzmā hai ishq

falak o mudda.ī o yaar o ajal

sab bhale haiñ magar burā hai ishq

dekhiye is kā hogā kyā anjām

ab ḳhudā se hameñ huā hai ishq

ho chukā ham se kuchh jo honā thā

tū ne ye haal kyā kiyā hai ishq

vāmiq-o-qais-o-kohkan kyā the

ajal-o-āfat-o-balā hai ishq

dekhnā shauq-o-sharm kā sheva

husn-e-ḳhud-bīñ hai ḳhud-numā hai ishq

kaun jaane thā us kā nām-o-numūd

merī barbādī se banā hai ishq

dil karo ḳhuuñ to kyā hai dildārī

jaan jaatī rahe to kyā hai ishq

ġham-zadā.ī meñ ġham-fazā kyā kuchh

dil-rubā yā na jāñ-rubā hai ishq

bā-vafā vo haiñ bevafā hai husn

bevafā ham haiñ bā-vafā hai ishq

ġhamza sā ġhamza ġham meñ kartā hai

kuchh se kuchh ab to ho gayā hai ishq

kaise kaisoñ kī us ne lī hai jaan

dekhnā kyā hī ḳhush-adā hai ishq

kyuuñ ke mātam na ab vafā kā rahe

mere marte hī mar miTā hai ishq

dekhnā marg-o-zīst ke jhagḌe

jāñ-fazā husn-o-jāñ-guzā hai ishq

vaisā hī hai farishta jaisī ruuh

ai ‘qalaq’ terā āshnā hai ishq

Leave a Comment