kisi harf men kisi baab men nahin aaega
tira zikr meri kitab men nahin aaega
nahin jaegi kisi aankh se kahin raushni
koi khvab us ke azaab men nahin aaega
koi khud ko sahra nahin karega miri tarah
koi khvahishon ke sarab men nahin aaega
dil-e-bad-guman tire mausamon ko naved ho
koi khaar dast-e-gulab men nahin aaega
use laakh dil se pukar lo use dekh lo
koi ek harf javab men nahin aaega
tiri raah takte rahe agarche khabar bhi thi
ki ye din bhi tere hisab men nahin aaega
Leave a Reply