Shaista Sahar
ye sitare mujhe divar nahin hone ke
ḳhvab se ham tire bedar nahin hone ke
main ne palkon ko bichhaya hai tire qadmon men
raste ab tujhe dushvar nahin hone ke
chahe tu jam-e-baqa dene ka va.ada kar le
ai masiha tire bimar nahin hone ke
dard-e-kaunain se labrez hon jin ke daman
vo mire gham ke ḳharidar nahin hone ke
ek hi iinT pe ham ne jo kiya hai takiya
ham kabhi sahab-e-divar nahin hone ke
chaa.e ki pyali men tufan uThane vaalo
ye tamashe sar-e-bazar nahin hone ke
jaap kar le tu mohabbat ke hazaron lekin
tere dushman tire dildar nahin hone ke
jin ke sinon men gaḌi kufr ki meḳhen huun ‘sahar’
vo kabhi diin ke vafadar nahin hone ke
Leave a Reply