Poet
milta hai qaid-e-gham men bhi lutf-e-faza-e-bagh
chak-e-qafas se aati hai farfar hava-e-bagh
roke zaban na bulbul-e-bustan sara-e-bagh
dohra.e phir mire se kaho majra-e-bagh
sunte hain ab ki aa.i hai kis dhuum se bahar
kya ji phaḌak raha hai qafas men bara.e baagh
kin chahchahon men apni basar hoti thi mudam
ai ham-safir kya ho bayan majra-e-bagh
guzre nasim idhar se to puchhenge ham asiir
ham ko bhi yaad karte hain naghma-sara-e-bagh
ai ham-safir ab to chale qaid ho ke ham
taqdir dekhiye hamen phir kab dikha.e baagh
mujh mast ka chaman men shanasa koi nahin
ik duḳht-e-raz qadim se hai ashna-e-bagh
paate hain sarv-e-gul men tiri shakl qadd-o-ruḳh
furqat men ji kahin nahin lagta siva.e baagh
us din se apne bulbul-e-dil ko hai ishq-e-gul
gulzar-e-dahr men hui jaise bina-e-bagh
milta nahin hai naḳhl-e-tamanna se yaan samar
phir koi kis umiid pe is ja laga.e baagh
nargis ki hai vo aankh na gul ka vo rang hai
chalti hai ab ki saal muḳhalif hava-e-bagh
ab chahchahe hain vo na nava-sanjiyan hain vo
shayad guzar gaya ‘qalaq’-e-ḳhush-nava-e-bagh
Leave a Reply