Ahmad Rahi
koi batlae ki kya hain yaaro
ham bagule ki hava hain yaaro
tang hai vusat-e-sahra-e-junun
valvale dil ke siva hain yaaro
sard-o-be-rang hai zarra zarra
garmi-e-rang-e-sada hain yaaro
shabnamistan-e-gul-e-naghma men
nik.hat-e-sub.h-e-vafa hain yaaro
jalne valon ke jigar hain dil hain
khilne valon ki ada hain yaaro
jin ke qadmon se hain gulzar ye dasht
ham vahi abla-pa hain yaaro
Leave a Reply