Jahanzeb Sahir
vo chand-rut ke hasin lamhon ki sha.iri hai
ki us ki baten hazar salon ki sha.iri hai
ye ḳhushk patte ki jaise rahon men lafz bikhre
udaas mausam men in daraḳhton ki sha.iri hai
hamari ankhen udaas ghazlon ke qafiye hain
hamara chehra purane vaqton ki sha.iri hai
tumhara hansna hamari nazmon ki ibtida thi
hamara rona tumhari ankhon ki sha.iri hai
ye sirf harfon ki tab-kari ka zahr kab hai
ḳhuda ke bando ye ham gharibon ki sha.iri hai
Leave a Reply