aap aae the yaan jafa ke liye
jaiye bhi kahin khuda ke liye
dil diya tha tumhen jafa ke liye
hosh men aaiye khuda ke liye
tere bazar-e-dahr men gardun
ham bhi aae hain ik qaba ke liye
paanv hain kucha-e-tavakkal men
haath uthte nahin dua ke liye
aa kabhi to mire qafas ki taraf
ai nasim-e-chaman khuda ke liye
hai tah-e-khak farsh-e-khak laga
shaah ke vaste gada ke liye
dam phadakta hai tauf-e-kaaba par
dil tadapta hai karbala ke liye
sar uthae hain khar-e-dasht-o-junun
‘muntahi’ se barhana-pa ke liye