ham ko to intizar-e-sahar bhi qubul hai
lekin shab-e-firaq tira kya usuul hai
ai mah-e-nim-shab tiri raftar ke nisar
ye chandni nahin tire qadmon ki dhuul hai
kanta hai vo ki jis ne chaman ko lahu diya
khun-e-bahar jis ne piya hai vo phuul hai
dekha tha ahl-e-dil ne koi sarv-e-nau-bahar
daman ulajh gaya to pukare babul hai
baaqi hai pau phate bhi sitaron ki raushni
shayad mariz-e-shab ki tabiat malul hai
jab mo’atabar nahin tha mira ishq-e-bad-guman
ab husn-e-khud-farosh ka rona fuzul hai
lut kar samajh rahe hain ki nadim hai rahzan
kitni hasin ahl-e-muravvat ki bhuul hai
Leave a Reply