nasir-kazmi

Gali Gali Meri Yaad Bichhi Hai Pyare Rasta Dekh Ke Chal

gali gali miri yaad bichhi hai pyare rasta dekh ke chal

mujh se itni vahshat hai to meri hadon se duur nikal

ek samay tira phuul sa nazuk haath tha mere shanon par

ek ye vaqt ki main tanha aur dukh ke kanton ka jangal

yaad hai ab tak tujh se bichhadne ki vo andheri shaam mujhe

tu khamosh khada tha lekin baten karta tha kajal

main to ek nai duniya ki dhun men bhatakta phirta huun

meri tujh se kaise nibhegi ek hain tere fikr o amal

mera munh kya dekh raha hai dekh is kaali raat ko dekh

main vahi tera hamrahi huun saath mire chalna ho to chal

More Poems

Leave a Comment