Seemab Zafar
ḳhirad ke jumla dasatir se mukarte hue
phir aaj dil se laga baiThe naam barte hue
sada.en do ki koi karvan-e-gham Thahre
hamen to raas na a.enge din sanvarte hue
jo mahv-e-raqs rahe rang-o-nur ke chau gird
bikhar ga.e hain tiri lau ka tauf karte hue
vo taḳht-e-jan tha jahan teri taj-poshi ki
so kis jigar se tujhe dekh luun utarte hue
hua tha hukm-e-safar dil magar tha ru-gardan
so rah men baiTh rahe dil pe dosh dharte hue
tumhare naam ke hijje sanvar kar us men
ab apna naam mila.enge rang bharte hue
junun pe ta.an karen parsa.i ke vaa.iz
havas ke kucha-e-rangin se guzarte hue
sahar qarib hui aao aankh men bhar len
ye paara paara tamanna.en ḳhvab marte hue
Leave a Reply