aftab-iqbal-shamim

Main Jab Bhi Chhune Lagun Tum Zara Pare Ho Jao

main jab bhi chhune lagun tum zara pare ho jaao

ye kya ki lams men aate hi dusre ho jaao

ye kar-e-ishq magar ham se kaise sarzad ho

alaav tez hai sahab zara pare ho jaao

tumhari umr bhi us aab ke hisab men hai

nahin ki us ke barasne se tum hare ho jaao

ye gosha-gir tabiat bhi ek mahbas hai

hava ke lams men aao hare-bhare ho jaao

kabhi to matla-e-dil se ho itni barish-e-ashk

ki tum bhi khul ke baraste hue khare ho jaao

More Poems

Leave a Comment