Sultan Akhtar
koi bhi shahr men khul kar na baghal-gir hua
main bhi ukta.e hue logon se ukta ke mila
din ke kandhe pe dahakte hue suraj ki salib
raat ki god men ThiThura hua mahtab mila
kahin ashkon ke diye hain na tabassum ke charagh
log patthar ke hue jaate hain rafta rafta
niind palkon ke dariche se lagi baiThi hai
sone deta hi nahin garm hava ka jhonka
vo chahakti hui khiḌki na mahakte dar-o-bam
un ke kuche men bhi kal maut ka sannaTa tha
laakh tahzib ke gharon men chhupe ham ‘aḳhtar’
phir bhi uryaniyat-e-vaqt se daman na bacha
Leave a Reply