Akhtar Azmi
ye vo yaqin hai jo uljhe yaqin se nikla hai
hamari haan ka ye dhaga nahin se nikla hai
ye dil hai sab se baḌa bhiik mangne vaala
pa zindagi ka ḳhazana yahin se nikla hai
tire liye jo yaqin dil men aa gaya tha mire
vo saanp ban ke miri astin se nikla hai
falak ki chaah men jhuTa yaqin zaruri hai
ye maan lo ki sitara zamin se nikla hai
jahan main duub gaya aur dubta hi gaya
samundaron ka samundar vahin se nikla hai
mujhe panah mire dil-nashin ne di hai sada
mira makan mire hi makin se nikla hai
ye ḳhar-e-ishq hai ‘aḳhtar’ maza hi deta hai
agar chubha to kahan ye kahin se nikla hai
Leave a Reply