Poet
sub.ha se matlab na kuchh zunnar se
hain juda ham kafir o din-dar se
ishq hai us abru-e-ḳhamdar se
kaTunga ik din gala talvar se
dil mira aTka hai chashm-e-yar se
hai mohabbat mardum-e-bimar se
yuun evaz luun ji men hai aghyar se
ghar jala duun ah-e-atish-bar se
hain ayaan kuchh ishq ke asar se
sho.ale uThte hain dil-afgar se
kyuun na dil apna nazar-o-zar ho
kuchh nazar aate ho tum bezar se
rashk se dil men na kyuun jal jaa.e sham.a
lau nikalti hai tire ruḳhsar se
hijr men ho kyuun na lazzat vasl ki
hai maza inkar men iqrar se
kucha-e-kakul men kho kar naqd-e-dil
mol sauda laa.e ham bazar se
jhanke rauzan se jo tujh ko raḳhna-gar
phoḌ Dalun sar ko main divar se
jaan aafat men paḌi hai ai tabib
maut behtar hijr ke azar se
har qadam par shor-e-mahshar hai bapa
piste hain dil aap ki raftar se
ḳhizr la kar den agar ab-e-baqa
main na badlun sharbat-e-didar se
tegh-e-abru ka jo bosa de to de
varna zalim qatl kar talvar se
ḳhil.at-e-uryani aur jagir-e-dasht
ham ne paaya ishq ki sarkar se
sarv ke chehra kamar siina kahan
is ko kya tashbih qadd-e-yar se
hijr men jangal se hai gulshan siva
gul bhi mujh ko kam nahin hain ḳhaar se
ja-e-asa.ish nahin hai dusri
baḌh ke tere saya-e-divar se
roz tanha.i men rahti hai yahan
guftugu pahron ḳhayal-e-yar se
zulf-o-ariz chashm-o-abru ḳhal-o-ḳhat
dil nahin bachta inhin do-char se
bosa ab qand-e-mukarrar ho gaya
duuni lazzat ho ga.i takrar se
shart men boson ki bhi kiya lutf hai
jiit men kam-tar maza hai haar se
ek gul-ru par hua dil daagh daagh
phuul laa.e aaj ham gulzar se
koi mai-kash phir na baiTha ek dam
main jo uThTha ḳhana-e-ḳhummar se
bulbulen us rashk-e-gul ke hijr men
nochti hain apne par minqar se
‘sehr’ bhejenge ghazal ye yaar ko
shauq hai us ko mire ash.ar se
Leave a Reply