Hasan Naim
vo jo dard tha tire ishq ka vahi harf harf-e-suḳhan men hai
vahi qatra qatra lahu bana vahi reza reza badan men hai
vo nasim jaane kahan ga.i vo gulab jaane kidhar khile
koi aag pichhli bahar ki mire qalb men na chaman men hai
yahi vaqt sail-e-ravan liye miri kashtiyon ko Dubo gaya
koi lahar ab-e-hayat ki abhi gang men na jaman men hai
dam-e-sub.h aaj hai dopahar na vo chahchahe na vo zamzame
vo parinde uḌ ke kahan ga.e koi shor gaanv na ban men hai
jo sitara qibla-e-rah tha vo sharar ban ke bujha ‘na.im’
ye zamin chadar-e-ḳhak hai mira chand jab se gahan men hai
Leave a Reply